У сярэдзіне мінулага тыдня ў Драгічыне адбылася 18-я сесія раённага Савета дэпутатаў 27-га склікання. Народныя выбраннікі сабраліся ў гарадскім Доме культуры, каб абмеркаваць сітуацыю ў сферы гандлёвага абслугоўвання насельніцтва і іншыя надзённыя пытанні і прыняць адпаведныя рашэнні. Адкрываючы сесію, старшыня раённага Савета дэпутатаў Святлана Уладзіміраўна Барташ паведаміла аб тым, што, акрамя дэпутатаў, для ўдзелу ў ёй запрошаны начальнікі аддзелаў і службаў райвыканкама, старшыні сельвыканкамаў і сельгаскааператываў, кіраўнікі прадпрыемстваў і грамадскіх арганізацый. На дэпутацкай нарадзе прысутнічалі старшыня райвыканкама Юрый Васільевіч Дзядзюк, дэпутат Палаты прадстаўнікоў Нацыянальнага сходу Юрый Іванавіч Дарагакупец і член Савета Рэспублікі Нацыянальнага сходу Рэспублікі Беларусь Людміла Уладзіміраўна Нікалайчык.
З дакладам па асноўным пытанні парадку дня – аб гандлёвым абслугоўванні насельніцтва раёна – выступіла начальнік аддзела эканомікі райвыканкама Алена Васільеўна Раманюк. Яна, у прыватнасці, адзначыла, што ў бягучым годзе ў сферы гандлю Драгічыншчыны адбыліся істотныя змены, і ў многім гэта было звязана з правядзеннем у нашым райцэнтры абласнога фестывалю-кірмашу “Дажынкі-2016”.
Напярэдадні хлебаробскага свята ў горадзе быў узведзены і адкрыты гандлёвы цэнтр “Санта-Рытэйл”, спецыялізаваная кропка па рэалізацыі прадуктаў з мяса птушкі “Камароўка”, адноўлены буйныя магазіны райспажыўтаварыства “Прамень” і “Візіт”, абуладкавана яшчэ адна зала для наведвальнікаў у бары “Маладзёжны” і г.д. У бягучым годзе толькі мясцовае райспажыўтаварыства на развіццё і ўдасканаленне падведамасных аб’ектаў гандлю зрасходавала больш за 7 млрд. недэнамінаваных рублёў. У выніку адкрыцця новых аб’ектаў і рэканструкцыі дзеючых прырост гандлёвых плошчаў склаў 844 кв. метры, і на сённяшні дзень гандлёвая сетка раёна налічвае 320 магазінаў і павільёнаў, у ліку якіх 122 належаць райспажыўтаварыству, 104 – індывідуальным прадпрымальнікам, далей ідуць гандлёвыя аб’екты ведамаснай падпарадкаванасці (“Бярозаўскі мясакансервавы камбінат”, “Берасцейскі пекар”, “Драгічынскі камбікормавы завод”) і г.д.
У дакладзе было падкрэслена, што 56% гандлёвых кропак сканцэнтравана ў Драгічыне, а сельскае насельніцтва абслугоўвае 116 стацыянарных крам і 5 аўтамагазінаў. Акрамя таго, гандлёвыя паслугі вяскоўцам аказвае 31 аддзяленне РУП “Белпошта” і 12 комплексна-прыёмных бытавых пунктаў.
Пры ўсім гэтым за 8 месяцаў бягучага года рознічны тавараабарот у сферы гандлю Драгічыншчыны склаў усяго 95,9% да ўзроўню 2015-га года пры заданні 100,6%. У нашым раёне, як паведаміла А.В.Раманюк, гэты паказчык напрамую залежыць ад работы райспажыўтаварыства, якое змагло забяспечыць яго выкананне толькі на 83,2% да ўзроўню мінулага года. Выходзіць, што кааператыўны гандаль, які ва ўсе часы называлі “сферай добрага настрою”, на цяперашнім этапе пачаў здаваць свае пазіцыі. І сёння некаторыя з яго паказчыкаў патрабуюць значнага паляпшэння.
У ліку прычын, якія прывялі да такой сітуацыі, Алена Васільеўна назвала неапраўданую рэарганізацыю шляхам аб’яднання райспажыўтаварыства і ўнітарнага прадпрыемства “Хозторг”, што прывяло да страты пазіцый у рэалізацыі прамысловых тавараў. Як “слабае звяно” дакладчык абазначыла і кадравую праблему ў рабоце спажыўкааперацыі, што вядзе за сабой зніжэнне тавараабароту, парушэнне правілаў гандлю і культуры абслугоўвання.
У сваім выступленні Алена Васільеўна закранула і такое важнае пытанне, як наяўнасць тавараў айчыннай вытворчасці ў гандлёвай сетцы раёна, зазначыўшы, што з пачатку бягучага года іх удзельная вага ў рознічным тавараабароце склала 80,4 %. Была закранута і актуальная тэма пашырэння безнаяўных разлікаў за тавары і паслугі праз банкаўскія плацёжныя тэрміналы…
З садакладам па агучанай тэме выступіў старшыня райспажыўтаварыства Вячаслаў Львовіч Дашкевіч, які прааналізаваў прычыны зніжэння тавараабароту. У іх пераліку – нерэнтабельная работа часткі сельскіх магазінаў (у вёсках Гумнішчы, Віры, Язвін, Людвінова, Хідры, Какорыца, Папіна, Гута, Суткі, Заточча і г.д.). Па словах дакладчыка, не спрыяе паляпшэнню становішча спраў і тое, што многія пастаўшчыкі адпускаюць тавар пад рэалізацыю толькі на ўмовах папярэдняй аплаты. Вячаслаў Львовіч пацвердзіў і той факт, што на зніжэнне тэмпаў тавараабароту істотны ўплыў аказвае і кадравая праблема: па прычыне адсутнасці прадаўцоў скарочаны рэжым работы ў многіх гандлёвых кропках горада. Чакаюць работнікаў і за прылаўкамі магазінаў вёсак Першамайск і Дзятлавічы, каб узнавіць гандаль таварамі паўсядзённага попыту ў гэтых населеных пунктах.
Аб тым, як абстаяць справы з гандлёвым абслугоўваннем насельніцтва на месцах, а іменна – у Закозельскім сельскім Савеце, расказаў яго кіраўнік, дэпутат раённага Савета Міхаіл Мікалаевіч Валадкевіч.
Сваё меркаванне па вырашэнню агучаных праблем і пытанняў выказаў старшыня райвыканкама Ю.В. Дзядзюк. Асобная ўвага акцэнтавалася на тым, каб у тутэйшых крамах найлепшым чынам была прадстаўлена прадукцыя мясцовых вытворцаў і падаткаплацельшчыкаў, такіх як “Экзон”, “Фрост”, ”Мірон”, Антопальская ватна-прадзільная фабрыка і г.д.
Дэпутат Палаты прадстаўнікоў Нацыянальнага сходу Рэспублікі Беларусь звярнуў увагу на тое, што жыхары Драгічына нярэдка наракаюць, быццам бы цэны на тавары ў тутэйшых магазінах вышэйшыя, чым у суседнім Іванаве, і прапанаваў правесці маніторынг і супаставіць, што і колькі каштуе тут і там. І прысутныя падтрымалі такую ініцыятыву…
У ходзе сесіі дэпутаты разгледзелі і шэраг іншых пытанняў, звязаных з землекарыстаннем, ільготамі па выплаце падаткаў і г.д. Па кожным з іх былі прыняты адпаведныя рашэнні.
Галіна ШАФРАН
