Гэтага не праверыш, а ў летапісных дакументах сустракаюцца розныя звесткі аб узнікненні мястэчка Хомск. Прынамсі, населены пункт з такой назвай згадваецца ў 1552 годзе, што і стала падставай для таго, каб у мінулую нядзелю жыхары Хомска ўрачыста і дружна адсвяткавалі свой агульны 460-гадовы юбілей. Арганізатарамі мерапрыемства выступілі тутэйшы сельвыканкам на чале з У.А.Пацеюком і калектыў вясковага Дома культуры з мастацкім кіраўніком І.М.Красоўскім, а асноўную матэрыяльную падтрымку ў яго правядзенні аказаў Дра гічынскі камбікормавы завод, у склад якога ўваходзіць Хомскі сельскагаспадарчы ўчастак. Гэта прадпрыемства, якое ўзначальвае П.А.Дзеркач, выдзеліла прызы ў выглядзе зерня, сена, саломы і іншай запатрабаванай вяскоўцамі прадукцыі, якія з азартам былі разыграны ў латарэю напярэдадні канцэртна- віншавальнай праграмы. Шчаслівымі ўладальнікамі асноўнай каштоўнасці ў выглядзе жывога парасяці стала шматдзетная маладая сям’я Віталія і Любові Янушчыкаў з дзецьмі Янай, Яраславам і Дзянісам, якія прыехалі ў Хомск наведаць сваіх родных – Святлану Міхайлаўну і Віктара Антонавіча Янушчыкаў. У іх, у бацькоў, як адзначыла сямейная пара, і застанецца гэты неспадзяваны, але прыемны набытак.
Далейшае мерапрыемства ў многім адлюстравала не толькі традыцыйныя захапленні ў выглядзе разнастайных народных рамёстваў, але і сённяшні лад жыцця и побыт вяскоўцаў. У святочным сцэнарыі былі ўпамянуты многія: і самая старэйшая з тутэйшых жыхарак, 89-гадовая Алена Васільеўна Аніська, і самы юны вясковец, 11-месячны Аляксей Казачок. Асобная пашана была нададзена ветэранам Вялікай Айчыннай вайны, у ліку якіх на свяце прысутнічалі Мікалай Якаўлевіч Галах і Павел Данілавіч Макарэвіч.
Акрамя музычнага прывітання, смачныя прадуктовыя падарункі для іх падрыхтавалі прадпрыемствы «Фрост і К» і «Мірон», што размешчаны і працуюць на тэрыторыі Хомска.
Адметна, што М.Я.Галах, які ў час вайны бачыў і перажыў жудасную расправу акупантаў над сваімі блізкімі і аднавяскоўцамі, цудам уцалеў, ваяваў у партызанах і на фронце і цяпер з’яўляецца жывой легендай тутэйшых мясцін, быў адзначаны і ў ліку сямейных доўгажыхароў: разам з жонкай, Таццянай Паўлаўнай, яны пражылі ў шлюбе 65 гадоў. І за гэтулькі часу Мікалай Якаўлевіч дайшоў да ўласнага разумення асноў сямейнай згоды: «Трэба вучыцца дараваць і ў любой сітуацыі шукаць прымірэння».
Пасля вайны ветэран больш за 40 гадоў працаваў у сельскай гаспадарцы, і за сваю адданасць роднай зямлі, вёсцы і спрадвечнаму сялянскаму ўкладу ён атрымаў заахвочванне ад Драгічынскага камбікормавага завода.
Акрамя таго, намеснік дырэктара прадпрыемства па сацыяльных пытаннях і ідэалогіі С.С.Касмянчук перадала грашовыя прэміі шматдзетным сем’ям руплівых працаўнікоў Хомскага сельскагаспадарчага ўчастка, у ліку якіх былі Святлана Ула- дзіміраўна і Сяргей Васільевіч Голік, Наталля Алегаўна і Юрый Уладзіміравіч Лысун, Любоў Пятроўна і Мікалай Іванавіч Міцэвіч.
На юбілейным свяце былі агучаны і вынікі вясковага конкурсу на лепшае падвор’е. Для атрымання заслужаных прызоў на сцэну былі выкліканы сем’і старанных сельскіх гаспадароў: Івана Мікалаевіча і Алесі Міхайлаўны Мечнік, Аляксандра Мікалаевіча і Ніны Іванаўны Літоўчык, Сяргея Сяргеевіча і Алены Міхайлаўны Крук, Сяргея Сцяпанавіча і Алы Сцяпанаўны Плюшчэня, Аляксандра Уладзіміравіча і Алены Паўлаўны Губарэвіч.
Відавочна, што хомская зямля багата яркімі самабытнымі талентамі. Гэта засведчыла выстава малюнкаў выпускнікоў вясковага філіяла школы мастацтваў і цудоўны канцэрт мастацкай самадзейнасці, падрыхтаваны пад кіраўніцтвам І.М.Красоўскага, які не толькі сам складае добрыя вершы і песні, але і ўмее заахвоціць і натхніць на творчасць як дзяцей, так і дарослых. З замілаваннем слухалі прысутныя выступленні малодшых школьнікаў Ксеніі Елец, Анастасіі Рыбак, Крысціны Ігнатчык, Анастасіі Казека, Уладзіслава Хведанцэвіча, Андрэя Шыкулы і Дзімы Елеца. Шчыра апладзіравалі вяскоўцы і выканаўчаму таленту больш сталых тутэйшых самадзейных артыстаў: Івана Валковіча, Дзмітрыя Зіновіча, Людмілы Галавач, Андрэя Страпка, Улады До- мінай, Алены Шыкула, Яны Амельянчык і іншых. Павіншаваць і ўзняць настрой сваім суседзям прыехалі таксама аматары песні з Завершскага і Мікіцкага Дома фальклору.
Святочныя ўрачыстасці ў Хомску доўжыліся каля трох гадзін. А прысутным здалося, што гэты час праляцеў, як імгненне…
Галіна ШАФРАН
Фота аўтара
